عانَد برضــــــو ...
ضاعت من سنواتك عشْرَ ...
ولسع قلبك ...
كايس الطيبة ... وكايس العشرة ؟؟.
صبحت كل دروبك ... آهة وحسرة .
وصاحت باقي الروح الفيك منتشرة ...
ضاعت من سنواتك عشْرََ .
٭٭٭٭٭٭٭٭٭٭٭٭٭٭
مما قمت ...
سهرت ولعبت بيك الدنيا .
من شبيت ...
أصبحت متيم وكايس المنية .
رافع راسك ... وراسك ...
كل كلماتو الفيو ... منحنية .
مين أداك حق الحرية ؟؟.
وأدي أحلامك قوة بنية ... وطول في النظرة .
ضاعت من سنواتك عشرَ.
٭٭٭٭٭٭٭٭٭٭٭٭٭٭
مين الزلزل ساسك ؟ .
وغرق جوة بحور الريدة ... خيالك وراسك ؟.
كنت معاند قلبك ... وصعب مراسك .
هدت بالنظرات إحساسك ؟.
صبحت كل قبايلك ...
وأرضك ... وناسك .
صبحت عشمك في يوم بكرة ؟.
ضاعت من سنواتك عشرَ .
٭٭٭٭٭٭٭٭٭٭٭٭٭٭
كيف هداكَ سراب الوهم ... وتعبت ؟.
وكيف لي هسة ... بتجري وراه ؟.
علي الأحلام الرحلت عنك ... إنت صعبتَ .
وبرضو تشابي عشم في سماه !!.
أرحل عنو ...
خلي أنفاسك تهدا شوية ...
طلق طيفو ... وهد الفكرة .
ضاعت من سنواتك عشرَ .
٭٭٭٭٭٭٭٭٭٭٭٭٭٭
ياما كتير أصحابك نصحو ...
كل الحبو جمال القمرة ...
وغنوا ... وصدحوا .
وكل البي نيران الشوق إنجرحوا .
كل الهدوا حوجز الدنيا ... وغاصوا وسبحوا ...
كانوا بهاجروا لحدي القمرة ...
وياما أشتاقوا ... وحنوا ... وصدحوا ...
كل حصادم كان في الآخر ... تعب الهجرة .
ضاعت من سنواتك عشرَ .
٭٭٭٭٭٭٭٭٭٭٭٭٭٭
زولك أصغر منك ...
وأكبر منك ومن أحلامك .
زولك باعد عنك ...
وأقرب ليك من حرف الحب في كلامك .
شاغل بالك ونافر ... شارد ... زايد آلامك .
وصلت ليه حروفك وحبك ... وجاه سلامك .
عاند برضو ... وقال المبدأ ...
سابك هايم في أوهامك .
كل ما تقرب ... إزيد في النفرة .
ضاعت من سنواتك عشرَ .
٭٭٭٭٭٭٭٭٭٭٭٭٭٭
كل ربيع في الدنيا بحاكي ربيعك ...
وإنت ... ربيعك شايفو فريد .
ربيعك نافر ...
وشاهر سيفو عشان تلويعك .
وإنت ولا هماك ...
بي شوية إبيعك .
الله حسيبك ...
الله سميعك ...
بكرة يطفِّي جروحك ... وتبرا .
وترجع لي سنواتك عشْرَ .
