الســــوق
السوق ... تدافر ... وإدفروك .
يوم إنت واقع منكسر ...
يوم تنجبر ... في عين عدوك .
السوق مشاكل وجقلبة ....
داير صبر ...
إديك ... ويشيل منك ... قدُر ...
ماتبقي حالتو مشقلبة .
الناس مع السوق روحت ...
يوماتي بيه ممقلبة ...
واحدين قروشن عند بشر ...
ناساً كمل راس مالا جت ...
وَصَلت لحد السكلبة .
باعت بضايعها بالديون .
كل القروش ... أو أغلبا ...
مرهونة في يدين فقير ...
في جيبو سكنت عقربة .
وأتمقلب الما عندو كاش .
والناس تكورك لسة ... عووووك .
ما السوق ... تدافر ... وإدفروك .
السوق شفوت ... وملحلحين .
ما تدي غير العندو كاش .
لا للديون في كل حين .
بل وأضرب المحتاج طناش .
السوق تكون واحد خشن ...
تتسلي ... بي موت الفراش .
السوق تكون زي السجن ...
قلبك حديد ... شان المعاش .
لو زول أكل حقك ... قصد .
ترفع عصاتك ... زي كلاش .
وتشاكلو ... زي ما يكون عدوك .
تقلع نصيبك منو ...
ما تسمع كلام الناس "بلاش".
ما تخلي حقك يحننوك ...
ده السوق ... تدافر ... ويدفروك .
يازول أكان داير تعيش ...
زي الخلق ... حالك حسين .
كون أعمي وأطرش ...
وأوع من تسمع كلام الناصحين.
في الدنيا مافيش زول بدور ...
حال غيرو يبقي سمح وزين .
الناس بقت تاكل بعض .
واحد ضعيف ... أكلو السمين .
واحد ... مبشتنة حالتو...
ما لاقي البطايب والحنين .
الناس حياتا بقت تسوق ...
لي هاوية الهم والأنين .
الناس بقت في ذاتا سوق ..
باكر " ولادك ... إنكروك ".
ما السوق تدافر ... ويدفروك .
كيف نبقي ــ من أول ــ بشر ...
ننسي المفاخر والقروش .
العندو ياكل من حلال ...
ويدي البفضل ليو بشوش .
الناس تكون واحد سوا ...
لو زول يضيع ... الناس تهوش .
ما نرضي في بعض الضياع...
ما نجري زي جري الوحوش .
أصلو البجر ... والما بجر ...
غير رزقو ... أبداً ... ما بحوش .
والحكمة لو بيناتنا عاشت ...
ما بتتوهنا الكروش .
كل البشر من فد جنس ...
الراكب أمجاد ... والبكوش .
كيف ننسي إنو الدنيا سوق ...
ونعيش بُساط ... حلوين ... ملوك .
ما السوق تدافر ... ويدفروك .
بس نحن ... ما ندفر بعض ...
ما نعيش علي هوهيو ... وعض .
حب النفس أصلاً مرض .
ما بداوي غير الناس تمش ...
بي طيبة ــ كلها ــ في الرمض ...
أو تمشي كلها في نعيم ...
لا تكسرم ... لا يكسروك .
ده السوق ... تدافر ... ويدفروك