أنا البهواك
طال الليل ... وغاب نجمو ...
يا مولاى أناديك ليْ ...
تعبت من الهوى ... ورجمو .
وجمر الشوق ...
مووقد ... حي .
كفاىْ ... لامتين أكون تايه ...
وظلمك باقي في حجمو ؟؟.
مسافة إني ... أشتاق ليك ...
وأشيل صورتك تباريني ...
تكون غيرت خط سيرك ؟؟!.
تقيلة خطاي أتاريني .
ولا شردت يا ظالم ...
ودرت بعادي ؟؟ ... وريني .
فاكر قلبي ببقي براك ...
وباقي حروفي بنلجمو ؟؟.
يا مولاى ... أناديك ليْ ...
تعبت ... من الهوى ورجمو .
عشان قلبك ... مشيت قاصدك ...
ويلين قلبك ... لناس تانيين ؟؟!.
بدون إزرع ...
يكون حاصدك .
وأنا الزارع هواك ... مسكين ؟؟.
أنا الفي كل رؤاي راصدك ...
خيال ... وأحلام ... وصحو يقين .
أنا البهواك ... وأكون حاسدك ...
علي إنك نفور ... وضنين .
أنا الوحدت بيك الحب ...
محل أطراك ... أقول آمين .
تبيع الفاكرو ليْ ... لي سوايْ ؟؟...
وصدك يكون عليْ هجمو ؟؟.
يا مولاي ... أناديك لي ...
تعبت ... من الهوى ورجمو .
تخون إنت ...
ويظل بالي ... علي حفظ الغرام دايم .
قبلك ... قلبي كان خالي ...
عن كل البنات ... صايم ...
كؤوس من ريدك الحالي ...
بتروي البي هواك هايم .
حلمت ... معاك ... يكون حالي ...
مفرهد بالفرح ... قايم .
كسرت يقيني يا غالي ...
بقيت أشكي العذاب ... للناس ...
طال الليل ... وغاب نجمو ...
يا مولاي ... أناديك لي ...
تعبت ... من الهوى ورجمو .
وجمر الشوق مووقد ... حي .
كفاي ... لامتين أكون تايه ...
وظلمك باقي ... في حجمو ؟؟؟!.
