خلاص يا روعة ...
إنت خلاص...؟؟
مسافرة وماشة ... سايبة الناس ؟؟..
تخلي أحبة من بعدك ...
تجافي النوم ... ويصيبا اليأس .
أنحن سواكي ... ما نحن .
ونحن براكي ... ما نحن .
أنحن سواكي كابوساً ...
يجسد رهبة الأحداث .
ونحن براكي ... شمس الهم ...
تفوِّرموية العينين ...
وتحرق كل خلايا الراس .
ونحن وراكي ...
مصباحاً ... خمد وأتلاشي في الظلمات .
وأمسي يغازل السكنات .
وتسعدو سيرة الأموات ...
وترعبو كلمة الإحساس .
خلاص يا روعة ...إنت خلاص؟؟.
حليلك إنت ياروعة ..
أكنا معاكي ... روح وجسد .
أكنا معاكي ... صورة جميلة ...
جنة ... خميلة ...
وردة أصيلة ... حب ...
كراس ...
كتبنا عليو أغانينا ...
وروائع همسنا الماجد...
عناوين حبنا الخالد .....
لكن صفحة الأيام ...
ورمشات أعين الأقدار ...
بقت سفاح ... بقت محراث .
يهدد موضع أقدامنا ...
ويبدد معني إقدامنا ...
وبقي الوسواس ... يطاردنا ...
ومحل ما نفوت ... يلاحقنا ...
يقول لينا الفراق قرب ...
أظنو الرأفة ما شافا ...
ولا الإحسان ...ده ليو جرب .
وبدد حبنا السامي ... وبعثر عهدنا النبراس .
خلاص ياروعة ... إنت خلاص ؟؟.
مسافرة ... يا ربة الإشراق ؟؟...
يا آية عظيمة للأخلاق ؟؟.
غرام ... تتباهي بيه الدنيا ...وغزل مكتوب علي القرطاس .
خلاص يا روعة ... إنت خلاص ؟؟.
أنحن سواكي ...
يا قنديل طريق الخير ...
بلابل ...صوتا ما مسموع ...
وسط أصوات ... صغار البومة ...
والدلوكة ... والأجراس .
ونحن براكي ... زي أوجه ...
موشحة بي الحزن والصمت .
ونحن وراكي ...
زي أموات ... موسدة داخل الأجداث .
خلاص يا روعة ... إنت خلاص؟؟.
لكن برضو بستناك ...
بستناكي يا روعة ...
عشان تسقيني بي إيدك ... وترجعي بيَّ لي دنياك .
ونتماسك ونبدأ أساس ...
ونبدأ أساس جديد ... من تاني يا دنياي .
ويبقي شعارنا ... همس الليل ...
وصوت أمواج مياه النيل ..
ويبقي هوانا ... نيل وعطاء ...
ود ... ووفاء ... ندي وإخلاص.