منتدى أسرة الدفعة 26 اقتصاد
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

منتدى أسرة الدفعة 26 اقتصاد

منتدى لطلاب وطالبات الدفعة 26 اقتصاد بمجمع النشيشيبة ، جامعة الجزيرة ، ولكل طلاب وطالبات وأصدقاء الدفعة 26
 
الرئيسيةأحدث الصورالتسجيلدخول

هي مازي المطر بتقيف ولازي البروق تطلع

يهنئ المنتدى الدفعة 30 اقتصاد بمناسبة التخريج ألف ألف مبارك


 

 مســــدار أبو السرة

اذهب الى الأسفل 
كاتب الموضوعرسالة
ناجي الطيب
مرشح للإشراف والمراقبة
مرشح للإشراف والمراقبة
ناجي الطيب


مســــدار أبو السرة Fb3d4910
عدد المساهمات : 79
تاريخ التسجيل : 20/08/2009
العمر : 39
الموقع : أربجــــــــــــــــــــــــــــي

مســــدار أبو السرة Empty
مُساهمةموضوع: مســــدار أبو السرة   مســــدار أبو السرة Emptyالثلاثاء ديسمبر 27, 2011 4:41 pm

مسْدَار أبو السُّرة لي اليانكي
أُمّاتِي القِبيلْ
بي حِنّهنْ لجّـنّي
كَرفة وقَلدة
كيف شوق اللّبن رَجّني
حُزناً جاني في مَيْع الصِّبا يلَجِّني
أطلعْ مِنِّي يا جلدي المِنمِّل جِنيِّ
واطلعْ مِنِّي يا حُزناً بِقى مكَجِّني
خَلّني أبدا مُسداري
قفايا لي داراً بِقَتْ مِي دَاري وأودي
جِيتَا ..
وجِلْدِي بينو وبين عضايا الشّحَمَة
إلا النّار بِقَتْ قِدّامي
جِلْدِي اللّيلة بينو وبين عَضَايَا المافي
إلاّ تراني شَوّالْ الكِبِسْ
نِفّيخْ جَراريب الوَرَمْ هَدّامِي
في جِلدي الورم قُولَنْلي
واللاّ صَحِي الورم عَضّامِي
سفريتك مِي في النيّة
ماها الكانت محريّة
خابراكْ عِرِّيفْ ..
ذم العُربانْ واللاّ قِيام الوردية
مالكْ ؟؟؟
تَرْيَانْ ومندِّي
كاسي الكِتّان والهندي
قولَكْ كِكّيفْ ترجى البيشان
واللاّ الغُربة البي الزِّنْدي
برقاً عِبْدِلِّي الوَزْنِ
يا طاشْ .. يا جاب المُزْنِ
فَرِّقْ يا الضّيفْ
فِعْل الغَضْبان ..
أم فِرْفيرات الحُزْنِ
وشِنْ القَعدة
يا أبو السُّرة
شِنْ القَعدة في ضُل العمارات أم كمرةً برّة
ضُقْنا الحَنْضَل اليانكي
وبَلَعْنا المُرّة
كِمْلَتْ كوتة التُّمبَاك
صَقَعْنا الجِّـرّة
ووكت إتقفّلَتْ شِقّيشْ
قَبَلْ بي المرّة
نَرْمي أمُرنا في بلد المعاني الحُـرّة
الشّمْ خَوّخَتْ
ليالي الحّـرّة بَرَدَنْ
والبرّاق بَرَقْ ..
مِنْ مِنّا جاب القِرّة
شوف عيني الصِّقير بجناحو كَفَتْ الفِرّة
تلقاها ام خدود الليلة مَرَقَتْ بَرّة
مَرَقَتْ بَرّة ..
مَرَقَتْ بَرّة تغلي مديدة الحِلْبة التَسَمِّن رِدْفَها
السَمِنْ المبَسْتَرْ يانْكي
بعيرات الدُّخان في العين والويقود
وفي الفَشْفَاشْ يسوِّي عمايلو
بشيلو اليانكي ؟؟ شِنْ فايدة مديدة الحلبة والويقود
يا ابو السُّرة
قامت من دخاخين العمى تلمِّع وشِيها
اليانكي مِسْتَنِّيهَا
كان اليانكي مستنيها في مراية السَجَم في اللّيل
لقيتها مِتِلْ فريخ الطّير
مَرَقْ ود عينها من ود عينها
رجّافة المزمّلْ حُمّى
جَفَلَتْ مِنّو
وَقَعَتْ عندي
صدرها بغلي
يا ابوالسُّرة
شُفْتَ اليانكي في ود عينها
سُقْتَها للبحر
يمكن يغسِّل عينها من اليانكي
فُتْنَا الحَجْرة بالكَتّة وغطسنا مسافة
تبقى قَدُر مسالك الرّيدة
وما لاقانا من يغبانا في البحر الفَدَرْ تحتاني
ناس عارفاها
ناس عارفاكا
ناس عارفاني
نادينا القعوي والبُلْطي
قرقور السّمَك ودّانا لي دابي الخُشَشْ
نادينا عُمّال الطّمِي
عُمّال الطّمِي الصّارقيلا
والقَرْمُوط
وود الموية
وفُتْنَا عليها
كانت نايمة
عَجّال البحر حارساها
كانت نايمة بين حجرين وضُل ساسوية
وعُمّال الطّمِي الصّحونا لّمُو حصى البحر
قسموهو ياتْ من كان سبع جمراتْ
دابي الخُشّة قال :
أدُّوها في الجمرات تلات سبعاتْ
قُلْنا :
أدُّوها في الجمرات تلات سبعاتْ
مَسَكْنَا دَرِبْنَا
وعُمّال الطّمِي الصّحوها
خابرين الدّروبْ
مَرَقوبنا في مُشْرَعْ مسارب الضّيْ
لقينا الدُّنيا تترجّانَا
قُوقَا القِمْري
خَوّى صِقيرْ
وعَوّى حِديْ
وعُمّال الطّمِي الصّحونَا
لَمُّو على البعرفو الصّيْ
حَصَى القيزان
دوابي الدّارْقَة
والسِّحْليّة
والنّاسْ التِّحِتْ
النّاسْ التِّحِتْ خابرين عَمايْل اليَانْكي
مَرّة معونة لي اللّغّاف
ومَرّة دَوانْكِي
شِنْ معناهو جيبها إن كان ملوهو بوانكي
وصوتها مكتِّمو القَرَبين سيوف وسَوانْكِي
قولَنْ لي الأَخْلو ديارو
دمّكْ فَرْهَدْ في نارو
غَوّرْ في الأرض
طارو صَقْرين
أولاد الأرض ما طارو
لحمي غَطّى بِنْ عَمِّي
شو صار حالو يا إمِّي
منديل العِرْضْ في بيت الدِّينْ
دمِّي ما يخلِّي دمِّي
إنّا من دير ياسينْ
صِرْنا في جِزْر التّين
عَمْ نسقى بعضْ
حُبّ الزّيتونْ بدّو يرجع للطينْ
صابرا تحت الدورية
صابرا فوق الدورية
صابرا فوق الدورية
يا حال الضِّدْ
لحم الطِّفلين نابت غُصنْ الحريّة
جِذْري مو في شاتيلا
ما قال حالي يا ويلا
حِنّا في الأرضْ
أرضِ فلسطين
يا إمِّي هيلا هيلا
يا إمِّي هيلا هيلا
يا أُمِّى هيلا هيلا
هيلا
هيلا
هيلا
هيلا وهيلا يا ابو السُّرة كُجْ العين
تخبر الشّينة من الزّينْ
تَفُرْز الطّاري من السّاري
يا ابو السُّرة كُجْ العينْ
ومدُّو صباعك السّبابي
قول لي الغَافي يا زول هويْ
وهوي يا غافي يا زول هويْ
أرخي الغُردة للعَنّافي
شِدْ القمري بالحوبابي
في مسدارنا
شِلْنا نهارنا
في إيدنا من ساسو البحر عقدينْ
مَسَكْنا دَرِبْنا
وعُمّال الطّمي الصّحونا
خابرين الدِّروب مرقوبنا في مُشْرع مَسَارب الضّيْ
لقينا الدُّنيا تترجّانا
قوقا القِمري
خَوّى صقيْر
وعَوّى حِدَيْ
وكُنّا جماعة
دابّات الأرض والسّايمة
عَوّامة البحر والطّيرْ
وحتى الغيمة قصّاصة الأَتَرْ
فوق راسنا شايفة الدّربْ
ضِنيب اليَانْكي
قال القمري لي الضُّليلة :
خَلِّكْ صاحية زوغ اليانكي لا يودِّرنا
قال الدّابي :
إن يغباها ما بيغباني
ولمّا الشّمْ مودِّعة غاربة
وَصّتْ جملة الصّقّار عيونهنْ كَارْبة :
أبقو أَلِفْ
بَفوت لي المِتْلَكُنْ ناهضينْ
وفوق ديناب عريباً غادي
قال السِّحْلي لا تغشوهو
ديل عُربانْ توابع اليانكي
وخَلُّوها العريب الغايبة
السّراقْ طبيقو معاهو
تيجاناً عروشها الخروعْ ..
الهَشْ ..
العَويشْ
الناّر تَعَلِّبْ فوق عُقَال العَرْشْ
ولا خَسّانا بي هادي العروش الهـُرْبة
يا ابو السُّرة .. لا عَقّالْ
مسكنا دربنا
وعمال الطمي الصحوها
خابرين الدروب مرقوبنا من وادي الضلمة
الكان
وعقب لمينا في باقي الجمع
قاصين دريب اليانكي
سنور الغيب في الكونغو
وصبراً من جنوب أمريكا
ومن كلهاري ديباً ضاري
والتمساح وليد أمازون
ونمراً في النمور كمبودي
وام رَخَمْ الله مكسيكية
ولمّ لميمنا
لمّ لميمنا والشّمش البتوقد فوقنا
شدّ شديدنا لا التِّمثال مَشيّلْ روقنا
عَالَم حُرْ يدوعِلْ فوقنا
لي يوم سوقنا
نبصُق فيهو .. في عينيهو جَرْ واسوقنا
يا شمسي طِلِّي .. طِلِّي
شاوري عَ بيتي دِليِّ
كَيّال الكيل .. ختياري ماتْ
ظِلِّي عَمْ يحرس ظِلِّي
عَادِلْ عَ خَييّ ميلي
خَييّ ما يحمل شَيلي
ما خَفّ الشّيلْ
تاني المرّات ناطِرْ رصّاصِي سيلي
عيني في الفيل ما ظِلّه
كِلْنا ندريه ما نضِلّه
يا ويل الويلْ
نرمي الجمرات عَدِّ المستشْهِدْ كِلّه
نرمي الجمرات عَدِّ المستشْهِدْ كِلّه














أحلام الحزن الفرعوني
الشاعر / محمـد طـه القـدال
الحلم الأول
بحر المالح سيلاً ضرّع و موجاً فرّع من الشام
من ناك للسهلة النجدية
الأم البكر الزنجية
يا وادي الزنج
خيمة إنقجت كانت ركزت فوق سنار لو آخر
لي ريحة القهوة العربية
كانت فابريكة بن
كانت مشتل أبنوس
كانت فى الشعر القرقد قايم شتله تجامل الشتله
التفل الروس
كانت فى الطبع الحار
الريد الحار
الحزن الحار
الحزن الجن الأحمر
كان مهووس

الحلم التانى
الخيل فى الخيل
و الخيل الخيل فى
لي فاطمة أم حجل
العرجون
الخيل مرحات
النوق مرحات
الخيل الدفرت
دفرت وادي صعيد أسوان
للبت البكر الزنجية
النوبة تصيح
حلفا نبيح لي
للنهد السابح فوق الريح
للعشق الساخن رجاى
الخيل الدفرت
دفرت دنقلا دون لا جاى
الحلم التانى
المد التالت غاشي الدامر بالعطرون
النار ما حرقت دار شنقيط
النار ما بتحرق وادي الزنج
النار آبنيه
يابنية العرب الزنجية
و بنية الزنج العربيه
النار فى النار
نيران ألوان
شيتن قرأن
و شيتن يا حليوه الحزن الجاكى يكون غبيان
و شيتن فى الفرح التايه فيكى
كذا الضهبان
وشيتن فى قليب الجدى الهشة الرخص النيه
الريد الليك متحمد
سركى مسوكر جاك آبنيه بلا عنوان
الحلم الثالث
التربة الأولى الموس الشفرة الصغرى
التربة الأولى الموس الشفره الصغرى
التربة الكبرى الموس الشفره الكبرى
التربة الكبرى الموس الشفره الكبرى
الوجعه الكبرى
الستر العار
العار
العار
الشهوة انبهلت
إن المؤوده انسألت
يا ووب البطنه الطلعت
البطنه الرجعت يا ووب
يا ووب الروح الطلعت
روحا مرقت تردح يا فرعون
الأم الجاضى حشاها يا ووب
العين فى السما و الليد فى جناها
الميلاد يا ووب الضاقت فى
أم ستراً مكشوف غطيها
البت يا دوب بكريها
ألحق يا الطايل باعك
نادهاك فى الضيق
الفا الدركان بسراعك
سهل فى الحوبة قساى
وبرد في الحارة حشاى
الرحم انشقا
و دخلت مرقت دخلت مرقت
..صلت ندهت سكتت كتمت
سكلت
إن المؤوده انسألت
اللهب الهبله النار
المهلة آ ناس
المهلة تطير
الرحم انشقا
المهلة متين ألقاها
و السهلة متين ألقاها
المهلة حليل
السهلة حليل
البلد الشجر البحر الطير ووباى
الريق نشفان من القوقاى
وكان فى الحلة الناس بتجض
و اللوز فى القطنه هناك بيجض
و النسمة التائهة وغاشية الحلة سموم بتجض
و البسمة انبهتت للدمعة ونزلت دمعه وفوق
عيون بتجض
وداك اليوم
مسيخه حليوه يا فرعون
لهيب بيبق
وقالوا قبيل كمسيب الغبينه يشق
و ألاّف الألوف رايح
و أكّال الكتوف رايح
و البمشى فوق زبد البحر
الببلع السيخ و الحجر
ويا الدمع النزل فى الحارة
دميع الرجال غلاب
و يا الغبن الوقف فى الحلة شوكت حوت
يكون حزناً فدر فى رجالنا مو كضاب
يكون حزناً فدر فى رجالنا مو كضاب











































منتديات رفاعة > منتديات رفاعة > منتدى الرياضة > رائعة القدال الطمباره والغناي ...غناء عقد الجلاد

المساعد الشخصي الرقمي
Ggnngtrhe;s ,mhekyeyhoekyoeyiokyoeyko

10-02-2005, 06:36 AM
[ram:b01fcb0200] الطمباره والغناى
المدينه

ياولدى الدروب شقاقا بحر التيه

ليك درب ولا دربين مساك الدروب ضهاب

ليك قلب ولا بالين وسواى القلوب كضاب

ليك ضهر ولاسرجين ركاب السروج وقاع

شق ياولدى بحر التيه بتتدردر وتتودر

ولامن يوم علي تايتنا ديك ترسي

نعزك بالقبيل داخرنو ليك

الشوق بحر ياولدى بحراً تيه

قت ليك العليك ادرابو لا تنغش ولا ترضابو لاتنغش

في الزمن الزمين والكي يسوهو خلاف عشان الني

عليك الدور وتصريف الليالي بدور تشيل ما شلنا من الهم

ولا من دمعه ترمي الدمعه فوق دربك

روح يابا .. وابق قفاك لاتعاين ولاتعاين علي موطاك

ولا تندم علي خطوا تملي مشيتو لى قدام

وابقي العاتي زى سنطتنا زى صبرا نلوك فوق مرو زى الزاد

لاشيتاً نزل في الجوف ولابرجع ولا بنزاد

واركز للبجيبها الريح تقيف انت ويشيلها الريح

وابقي العاتي والدرب الوراك مسدود و شيل شيلتك

بقيت للنص لاحلما بجيب البر ولا حدود

وانبليتا اختا الرمله ما تقع البكان الهش

هي الممطوره مابتبالي من الرش

النعمه بتعرف عاطيها والجمره بتحرق واطيها

بالكيله عطانا و ما لقينا فوق جمر خطانا وما لقينا

يوم الوعد... ياحليوه فيك الدنيا ما كانت شروق

الا الارض متكشفه متبلمه نعمنو من خير الخريف

لافحالها شال منطرحه خضرا وفرحه دوب تتشابي لي عين الشمس

من بت حليوه النفس بيضا كذا الحليب

والروح مشحتفه في البلود الفيها ريحتك

للبعود من فزعة الغربة البساسق فوكا

موراجع ولا بالحيل قريب

الروح مشحتفه في الحبيب القلب بكر الدنيا ما شافت جديدو

ولا الحزن دقالو باب

وشفتي كيف يوم الوعد كيفنو مترامي الغمام

والقمري زغرد للبلوم النسمه هبت مرتين

يا حليوه يوم دقيت بارضك فاس خصيب والتانيه في

يوم الوعد والايد تسالم في الايدين

والام تقالد فوق جناها تشمو زين

وحليوه صاحيه حليوة ضاحيه كذا النسيم

والدنيا غيم وحليوة جد جد ياولد قول للبلد

قايل غناوي الحزن ليش شايل مساديرك مجامر دمع ليش

ليش يا بلد والناس تريد والدنيا كل ما نريد تزيد

تملا الايدين تفرح تهش

لو صحيح غنينا بالدمعه الحميمه ولو دموع الفرحه ما لاقت غنانا

بكره نرجع تاني للكلمه الرحيمه شان هنانا شان منانا

شان عيون اطفالنا ما تضوق الهزيمه

http://www.igdelgalad.net/66.jpg

osama ag
10-02-2005, 07:32 PM
اغنيه جميله
تلهبنى كثير وتنعش احساسى بلحنها الرائع
رائعة هى المعانى عندما تصاغ بصدق
والروعه تكتمل بجمال ازواقكم
شكرا لك السفاح
وانت تمتعنا بهذه الاغنيه المتفردة الكلمات
والشكر الى فننا الذى مازال
ينبض بالسحر فى حضن عقد الجلاد
فلابد ان تجد فى وسط الظلام قمرا يؤكد لك ان هناك امل
شكرا عقد الجلاد
والى القدال...
ونحنا اهل الفرحه جينا
لاالمدامع وقفتنا ولا الحكايات الحزينه










الرجوع الى أعلى الصفحة اذهب الى الأسفل
 
مســــدار أبو السرة
الرجوع الى أعلى الصفحة 
صفحة 1 من اصل 1
 مواضيع مماثلة
-
» السرة بت عوض الكريم

صلاحيات هذا المنتدى:لاتستطيع الرد على المواضيع في هذا المنتدى
منتدى أسرة الدفعة 26 اقتصاد :: المنتدى العام-
انتقل الى: