بيان رقم (3)
إدارة الأزمة بين (لاهاي)
وبين السُلطة والسودان
............
وكيف الأزمة
يا فراجة
يا هتيفة
يا رجرارجة
بين الأمة والسلطان؟
مساكين نحن اسم السعب
موجودين ومنسييّن
ساعة الأزمة
نصبح (في )
بعد الأزمة
نصبح (كان) .
مساكين نحن اسم الشعب
ساعة العصرة جابونا
بعد العصرة خلونا
يوم الغزوة مرقونا
بعد الغزوة عصرونا..
- فوق للعادة _
قالوا كرامة الأوطان
.....
كرامة شنو؟
سيادة منو ؟
ونحن الشعب
مقهورين ومنسييّن
لا قوت يوم
ولا سُـترة
جديد دُلقان
تسوقونا وتمرقونا
وكت تلقوها جات في تولا
ساعة الزنقة والطوفات
وبعد الريح تعدي تفوت ما تدونا حتى (القوت )
وكان طنطنا أو كركبنا أو فرفرنا أو ظاهرنا ترمونا بعلب (بمبان).
سيادة شنو ؟
وإنتو السادة فوق للعادة
ونحنا متين كتبتونا
تحت عنوان(اسم إنسان)؟
يا دفع الله ده الإعلام
ودي الأقلام
وديل ناس شوفو ناس (كضباي)
ناس بعنا وناس كتبونا في كشف الحوافز ساي
وناس الرأي مليون رأي
وناس وشين وش للحش و وش للغش
ما ولع شرف شاعر ولا أبدع ضمير غناي .
الخواجة (وقت الحاجة)
والحجاج يوم نحتاج
ويغور الشعب يقع في البير
وقت قايلنو نام وعوير
ويعيشوا السادة فوق للعادة
من رتبة
(خليفة)
(إمام)
ولي رتبة
(عقيد)
و(مشير).
